• FURMAZIONEEducazione pupulare

Prisentazione

Interrugà si à nantu à e prublematiche di a nostra sucietà da afferrà le megliu, da i mezi per accumpagnà a ghjuventù è aiutà la à truvà a so piazza in a sucietà, prumove u sportu per tutti, permette à i più boni spurtivi isulani di campà a so passione dendu li accessu à l’eccellenza, spiegà i scopi di u sport… Ghjè ciò ch’ellu prupone à longu à l’annu u Centru di u Sport è di a Ghjuventù (CSJC) in u quadru di a so missione d’educazione pupulare. 
Da riesce isse azzione, ci arrimbemu à nantu à cumpetenze tecniche è pedagogiche in sti duminii : 
Libru è lettura ; arte dramaticu ; arte è tradizione pupulare ; arti plastichi ; ballu ; maghjine è sonu ; musica ; spressione scritta è urale ; lingua è cultura Corsa ; scenze ecunomiche è ghjuridiche ; scenze umane appiegate ; attività scentifiche è tecniche ; scenze è tecniche di a cumunicazione ; ghjuventù. 
 

L’educazione pupulare in Corsica

L’educazione pupulare in Corsica

In Corsica, e federazione maiò d’educazione pupulare sò scarse. Per ciò chì tocca à l’attori di l’indiatura laica republicana, truvemu e duie FALEP (pumuntica è cismuntica) membre di a famosa « Lega di l’insignamentu ». Parechji associ sò affiliati à ste federazione. Quelle sò indiate in u suciale (in particulare quella pumuntica) à u cuntrariu di u livellu naziunale (voltu ver di u latu educativu). 
Esiste dinò in Bastia una raprisentazione (chjuca) di e CEMEA (Centri d’Appruntera à i Metudi d’Educazione Attive) chì s’occupa per u più di furmazione à i BAFA/BAFD. A CCAS, assai prisente, hà ella dinò è dapoi un pezzu ughjettivi d’educazione pupulare. Infine, esiste qualchì centru di vacanze amministratu da a fundazione Leo Lagrange. 
Sempre per ciò chì tocca à e federazione maiò, ci vole à sapè chì s’e i « scout » è « l’éclaireurs » di Francia ci sò stati dopu guerra è fin’à l’anni 80, u territoriu accoglie solu avà gruppi chì venenu da l’infora. Quachì gruppu a si prova di rinvivisce ma pare cù pocu successu. Qualchì attore si dice di issa tradizione maiò di l’educazione pupulare, ùn essendu micca legati à nisuna federazione. U gruppu u più impurtante è u più cunnisciutu hè l’associu ARIA creatu in u 1997 da Robin Renucci chì dapoi 20 anni porta azzione maiò in giru à u teatru in u Giunssani. 
Per compie si pò amintà l’attori chì sò à cantu à issa indiatura (à livellu storicu) di l’educazione pupulare chì adopranu metudi è chì anu oghjettivi o pruponenu azzione chì pudarianu esse integrati in un prughjettu d’educazione pupulare : club-sinema, cumpagnie di teatru, associ di quartieri ecc… 
 

L’educazione pupulare à u CSJC

Bisognu à dì ch’ella hè sempre stata prisente à u CREPS. U « EP » significhendu à postu « Educazione Pupulare » è micca altr’affare. Si capisce ancu di più quand’ellu si sà chì i CREPS eranu stabilimenti naziunali spechji di l’urganisazione di u ministeru, ma hè scunnisciutu è micca capitu à livellu lucale. À u CREPS di Corsica, 2 cunsigliere d’educazione pupulare è di ghjuventù eranu in funzione. Quand’ellu hè statu creatu u CSJC in u 2010, a dimensione d’educazione pupulare hè cunfirmata in e vie di sviluppu chì sò priviste.  
Sin’à u 2017, l’educazione pupulare à u centru di a custruzzione di l’omi, hè trasversale à u CSJC. U stabilimentu hè un « attore educativu » di u territoriu à parte si da una via di l’educazione custruita à nantu à valori è metudi di l’educazione pupulare. 
Qualsia u pubblicu (atleti interni, imparaghjoli in inserzione o in furmazione, tuttu pubblicu, pubblicu in situazione di svantaghju, partenarii) è qualsianu l’azzione purtate, l’ughjettivi sò sempre di circà à sviluppà u « putere di fà » di i pubblichi, di sviluppà a so autonomia è a so respunsabilità, di schjarisce i raporti suciali chì sò prinsitati cum’è scuri, d’interrugà si à nantu à e raprisentazione, di ricunnosce u valore di a sperienza d’ognunu. 
 

Mezi è metudi

À u CSJC, sò utilizate à spessu e pratiche culturale è artistiche chì permettenu di simbulizà i raporti suciali, di sviluppà u vucabulariu simbolicu. Ma ùn sò micca u solu mezu. 
À u centru di tutte l’azzione è chì custituisce u mezu di e trasfurmazione cullettive, si trova u cunfrontu à l’altru, ancu u cunflittu (intesu cum’è pusitivu, necessariu, custruttivu) è l’utilisazione di materiale simbolicu : sò i metudi attivi aduprati à u CSJC in furmazione in i scambii auropei cum’è in l’accolte cullettive di menu di 18 anni è cum’è arnesu di u campà inseme. Sti metudi si ponu aduprà cù varie mudalità d’intervenzione. Parechje furmazione à nantu à l’arnesi è i metudi di l’educazione pupulare si facenu à u CSJC per l’associ è l’istituzione partenarie. Sta perizia pedagogica custituisce una di e furtune di u stabilimentu.  
U linguaghju hè dinò impurtantissimu. Ghjè à tempu di « rende a ghjente impurtanta da e parolle ch’ella dice » (Albert Jacquard), d’arrimbà si à nantu à a so sperienza, a perizia di a so propia pratica è cusì di « dà a parolla » u più à spessu è in più bone cundizione è dinò di favurizà a maestria di issa parolla. 
Infine sò circate è in tutte e situazione, a cu-custruzione, l’imparere urizuntale è a cuuperazione. 
« Nimu ùn educa à nimu, nimu ùn s’educa solu, l’omi s’educanu inseme per via di u mondu » (Paulo Freire). 
NB : a scelta di favurizà i pubblichi mischiati à u CSJC hè una forte urientazione : dapoi à a lege à nantu à a cità di u 13 di lugliu di u 1991, u mischiu* hè pinsatu cum’è un mezu di sminuì e sclusione. Al di là di u puntu di vista di a pulitica di a cità, prupone attività à pubblichi varii hè una bona manera di prumove a lea suciale è a sulidarità è permette à tutti una cunfruntazione à u « mondu » in a so richezza è a so diversità. * a lege di u 1991 face rifarenza à u mischiu suciale ma prumove u mischiu trà e generazione o u mischiu trà, persone in situazione di svantaghju / persone valide, participeghja dinò à u sviluppu di una sucietà più ghjusta. 
 

Azzione di u CSJC

Cunfarenze, cunfarenze/debattiti, cunfarenze/furmazione à nantu à sughjetti di sucetà. 
Stasgi di riealisazione, sperimentazione : (Attelli VARAN, Mettez vous à table, Hybride(s), co-pruduzione diverse) 
Attelli è sperimentazione fatte mentre l’azzione d’insersione : Objekt , Microcosme-Trans- Expérience, Roman fleuve interlope, « Comment certains vivent » 1 et 2 ... 
Avvenimentu in giru à u libru è a lettura : azzione in partenariatu cù a bibbiuteca dipartimentale di a FALEP (dispusitivu « leghje è fà leghje »), attelli di scrittura. Sughjorni auropei, accolte cullettive di i menu di 18 anni, Furmazione, vita di l’interni : utilisazione di metudi d’educazione micca furmale, di cumunicazione micca viulente, d’imparera da a sperienza, realisazione d’opare cullettive. 
Per ciò chì tocca à u numericu : di pettu à l’imbusche, schjarì l’affare hè di primura, cum’è quella di u sviluppu di u sensu criticu. A creazione di i « 24o di u LAN » cum’è di u Fab Lab d’Aiacciu sò indiate in stu cuntestu. 
Infine, l’attività spurtive cù u sforzu di u corpu sò arnesi strasurdinarii per l’educazione pupulare. U sviluppu di u « sportu per tutti », a primura di l’acessu à i sporti è à l’asgi, à a salute è à u benestà facenu parte di l’azzione d’educazione pupulare di u stabilimentu.